Beint á efnisyfirlit síðunnar

Leigusamningur

Húsaleigusamningur um leigu á Stúdentagörðum Félagsstofnunar stúdenta.

1. gr. Gildissvið 
Í samningi þessum er mælt fyrr um leigu á íbúðarhúsnæði til námsmanna og þau ákvæði sem gilda í samningssambandi aðila. Að öðru leyti en greinir í samningi þessum fer um samningssamband aðila samkvæmt húsaleigulögum nr. 36, 1994 með síðari breytingum, úthlutunarreglum Stúdentagarða eins og þær eru á hverjum tíma og gildandi húsreglum fyrir það húsnæði sem um ræðir hverju sinni, auk annarra reglna sem leigusali hefur sett eða kann að setja vegna þess húsnæðis sem um ræðir. Frávik frá ákvæðum laga nr. 36, 1994 í samningnum styðjast við 3. mgr. 2. gr. og 3. gr. a. þeirra laga. 

2. gr. Leigutími 
Leigusamningur þessi er tímabundinn: Leigutímabilið hefst þann XXX og lýkur þann XXX
Er leigusamningurinn bindandi fyrir báða aðila út þann tíma og er leigutaka skylt að greiða leigugjaldið allan leigutímann og leigusala skylt að leigja leigutaka hið leigða til sama tíma, enda komi ekki til ástæður sem heimila leigusala að rifta eða segja upp samningi þessum. 

Þrátt fyrir ofangreint er unnt að endurnýja leigusamning þennan og þá þannig að nýr samningur gildi fyrir sama tímabil næsta árs á eftir 
hverju leigutímabili um sig. Skilyrði þess að leigutaka sé unnt að endurnýja leigusamning þennan og gera nýjan samning við leigusala er að hann uppfylli skilyrði úthlutunarreglna Stúdentagarða, hafi staðið í skilum með leigugreiðslur og hafi ekki gerst sekur um vanefndir eða brot sem varðað geti uppsögn eða riftun leigusamningsins eða að öðru leyti vanefnt skyldur sínar á þann veg eða sýnt af sér slíka háttsemi að 
eðlilegt megi telja að leigusali vilji ekki leigja honum áfram. Er hér um að ræða lögmæt og málefnaleg skilyrði í samræmi við heimild 1. mgr. 3. gr. a. í húsaleigulögum nr. 36, 1994. Skal leigusali tilkynna leigutaka með eins mánaðar fyrirvara ef hann uppfyllir ekki lengur skilyrði til áframhaldandi leigu og um ástæður þess. 

Endurnýjun leigusamningsins fer þannig fram að leigutaki skráir sig inn á heimasvæði Stúdentagarða á vefslóðinni www.studentagardar.is með sérstöku notendanafni og lykilorði sem leigusali lætur honum í té við undirritun leigusamnings þessa. Þar smellir leigutaki á flipa með heitinu Endurnýjun leigusamnings og skráir þar þær upplýsingar sem krafist er og styður svo á flipann Senda umsókn um endurnýjun. 
Leigusali staðfestir móttöku umsóknar rafrænt. Fallist leigusali á umsóknina sendir hann staðfestingu þess efnis til leigutaka með tölvupósti og er þá kominn á nýr samningur með aðilum sama efnis og upphaflegur leigusamningur. Gilda þá öll ákvæði samnings þessa um hinn nýja samning eftir því sem við á. Leigusali tilkynnir jafnframt leigutaka með tölvupósti ef umsókn hans er synjað. Beiðni sína um framlengingu verður leigutaki að setja fram a.m.k. þremur mánuðum áður en upphaflegu leigutímabili lýkur. Það sama gildir í hvert skipti sem leigutaki setur fram beiðni um endurnýjun leigusamnings. Leigjandi hefur að loknum umsömdum leigutíma ekki forgangsrétt til leigu, ef hann uppfyllir ekki lengur kröfur úthlutunarreglna Stúdentagarðanna, sbr. 12. tölul. 2. mgr. 51. gr. húsaleigulaga nr. 36, 1994.

3. gr. Leigufjárhæð 
Leigugjaldið er bundið vísitölu neysluverðs (stig), (dags) ($S4F1;) ($S4F3;)   til verðtryggingar samkvæmt útreikningum Hagstofu Íslands og er hún grunnviðmiðun við útreikning á fjárhæð leigugjaldsins. Breytist leigugjaldið því í réttu hlutfalli við mánaðarlegar breytingar á vísitölunni. Mánaðarlegt gjald í hússjóð tekur breytingum til samræmis við breytingar á orkuverði hjá Orkuveitu Reykjavíkur. Leigusali áskilur sér rétt til þess að hækka umsamda leigufjárhæð umfram almenna hækkun vísitölu neysluverðs í september ár hvert. Fyrir því verða þó að liggja málefnalegar ástæður sem greina skal leigutaka frá. Komi til þess skal tilkynna um þá hækkun með minnst þriggja mánaða fyrirvara. 

Auk leigugjalds og gjalds í hússjóð skal leigutaki greiða leigusala sérstakt umsýslugjald samkvæmt gjaldskrá leigusala, sem nú er kr. 4.000, vegna úthlutunar á húsnæðinu. Umsýslugjaldið greiðist bæði við fyrstu úthlutun og við hverja framlengingu leigusamningsins og er innheimt með fyrstu húsaleigugreiðslu hvers samningstímabils. 

Leigugjald greiðist mánaðarlega og er gjalddagi þess fyrsti dagur hvers mánaðar, sbr 1. mg. 33. gr. húsaleigulaga nr. 36, 1994. Leigugjaldið er innheimt rafrænt og birtast  greiðsluseðlar í heimabanka leigutaka og skulu greiðast þar. Óski leigutaki eftir að fá senda greiðsluseðla skal hann bera þann kostnað sem af þeim og sendingu þeirra hlýst. Standi leigutaki ekki skil á greiðslu leigugjaldsins fyrr en eftir eindaga er leigusala heimilt að krefjast hæstu lögleyfðu dráttarvaxta frá gjalddaga til greiðsludags. Þá er leigutaki einnig ábyrgur fyrir greiðslu alls annars kostnaðar sem af vanskilum hans kann að leiða. 

4. gr. Trygging 
Leigusala er heimilt að krefjast þess að leigutaki setji tryggingu, sem leigusali metur gilda og fullnægjandi, fyrir réttum efndum á leigusamningnum, þ.m.t. fyrir leigugreiðslum og skaðabótum vegna tjóns á hinu leigða sem leigutaki ber ábyrgð á samkvæmt almennum reglum og ákvæðum laga þar um. Sjá úthlutunarreglur og hverjir gætu þurft að greiða tryggingargjald.

5. gr. Rekstrarkostnaður 
Um skiptingu rekstrarkostnaðar hins leigða og umhirðu að öðru leyti en greinir hér að neðan, sbr. og 8. gr., fer eftir V. kafla húsaleigulaga nr. 36, 1994 og er sá kostnaður sem leigutaka ber að greiða innheimtur um leið og leigugjaldið. 

Þar sem ekki berast reikningar beint frá veitustofnunum á nafn leigutaka skal leigutaki greiða sérstaklega fyrir notkun rafmagns og/eða heits vatns. Leigusali innheimtir slíkan kostnað um leið og húsaleigu og sér um greiðslur til viðkomandi veitustofnana. Er leigusala heimilt að leggja áætlanir veitustofnana til grundvallar innheimtunni, en að öðru leyti eru greiðslur leigutaka vegna orku innheimtar í samræmi við reikninga veitustofnana hverju sinni. Leigusala er heimilt að innheimta aukagjald ef leigutaki notar mjög orkufrek tæki, t.d. frystikistu. 

Leigutaka er skylt að annast ræstingu og sameiginlega umhirðu sameignar á móti öðrum leigutökum í húsnæðinu, allt samkvæmt ákvæðum gildandi húsreglna og fyrirmælum umsjónarmanns fasteigna Stúdentagarða. Er leigutaka m.a. skylt að taka þátt í allsherjarhreingerningu á húsnæðinu og lóð þess. Vanræki leigutaki verkskyldur sínar samkvæmt grein þessari, getur leigusali, auk annarra úrræða, látið framkvæma verkin á kostnað leigutaka og innheimt kostnaðinn með leigunni. 

6. gr. Ástand og afhending hins leigða 
Að öðru leyti en fram kemur hér að neðan gilda ákvæði III. kafla húsaleigulaga nr. 36, 1994 um ástand hins leigða við afhendingu þess. 

Leigusali skal í upphafi leigutímabils kynna leigutaka réttindi hans og skyldur. Hið leigða skal afhent á upphafsdegi leigusamningsins 
samkvæmt 2. gr. og fær leigutaki þá afhenta lykla að hinu leigða. Við afhendingu fær leigutaki úttektarblað þar sem hann getur skráð sínar athugasemdir við ástand hins leigða húsnæðis. Leigutaki skal koma úttektarblaðinu til skila innan 7 daga frá viðtöku húsnæðis. Ofangreinda úttekt skal leggja til grundvallar ef ágreiningur verður um bótaskyldu leigjanda við skil húsnæðisins. Sætti annar aðila sig ekki við það getur hann á eigin kostnað óskað eftir úttekt samkvæmt XIV. kafla húsaleigulaga nr. 36, 1994. Sé hið leigða ekki í því ástandi sem leigusamningur greinir eða leigutaki hlaut að mega gera ráð fyrir, skal leigutaki gera skriflegar athugasemdir innan einnar
viku frá afhendingu og segja til um hverra úrbóta sé krafist. 

Leigusala er heimilt að draga afhendingu húsnæðisins í allt að 14 daga ef nauðsynlegt reynist að framkvæma viðgerðir og úrbætur á hinu leigða til að koma því í leiguhæft ásigkomulag. Leigutaki á ekki rétt á afslætti af leigugreiðslu ef afhending dregst í fimm daga eða skemur. 

7. gr. Viðhald 
Leigusali skal að jafnaði halda hinu leigða í leiguhæfu ástandi, allt eftir því sem góðar venjur um viðhald húsnæðis segja til um. Leigutaki á ekki rétt á afslætti eða bótum vegna afnotamissis sem hlýst af viðhaldsvinnu, nema viðhaldsvinnan leiði til verulega skertra afnota eða afnotamissis. Leigusali skal láta vinna alla viðgerðar- og viðhaldsvinnu fljótt og vel og þannig að sem minnst röskun hljótist af. Ef nauðsyn krefur er leigutaka skylt að rýma húsnæðið á meðan viðgerð fer fram og á leigutaki ekki rétt til afsláttar af leigunni ef afnotamissirinn varir skemur en fimm daga. Leigutaki á ekki rétt á afslætti eða annars konar bótum vegna ónæðis sem hlýst af viðhaldsvinnu á öðrum íbúðum í húsnæðinu, nema sú viðhaldsvinna leiði til verulega skertra afnota eða afnotamissis samkvæmt mati úttektaraðila, sbr. 21. gr. 
húsaleigulaga nr. 36, 1994. Í þeim tilvikum þegar hið leigða er á byggingarsvæði kann ónæði að fylgja framkvæmdum og á leigutaki ekki rétt á afslætti eða annars konar bótum vegna þess. 

Leigutaki skal tafarlaust segja til um galla eða önnur atriði, sem þarfnast lagfæringa eða viðgerða og ekki voru sýnileg við venjulega athugun og/eða komu ekki fram við afhendingarúttekt. Sama gildir ef gallar eða viðgerðaþörf, hvort sem er innan- eða utanhúss, kemur síðar fram á leigutímanum, bæði hvað varðar hið leigða sjálft og búnað þess sem og húsnæðið þar sem hið leigða er staðsett, enda er leigusali tilkynningaskyldur gagnvart tryggingarfélagi sínu. Vanræki leigutaki tilkynningaskyldu sína samkvæmt framansögðu falla hugsanlegar bótakröfur hans niður og er hann þá einnig ábyrgur fyrir því tjóni sem af vanrækslu hans eða seinkun kann að leiða. 

Að öðru leyti en að ofan greinir fer um viðhald hins leigða, þ.m.t. um réttindi og skyldur hvors aðila samningsins um sig að þessu leyti, eftir ákvæðum IV. kafla húsaleigulaga nr. 36, 1994. 

8. gr. Afnot af hinu leigða, aðgangur leigusala að hinu leigða o.fl. 
Hið leigða er einungis ætlað til íbúðar fyrir þann/þá leigutaka sem tilgreindur/tilgreindir er/eru í samningi þessum og er hið leigða á ábyrgð hans/þeirra allan leigutímann. Óheimilt er með öllu að nota hið leigða á annan hátt en samið er um í samningi þessum og fram kemur í þeim lögum og reglum sem að öðru leyti gilda um samningssamband aðila. 

Leigutaka er með öllu óheimilt að gera breytingar eða endurbætur á hinu leigða eða búnaði þess. Leigutaka er óheimilt að festa nagla, skrúfur, króka og annað þess háttar í eða á veggi, gluggakarma, hurðir eða dyr hins leigða. Þá er leigutaka óheimilt að skipta um læsingar á hinu leigða. Geri leigutaki nokkuð í bága við bann þetta getur leigusali krafið hann um kostnað við að koma hinu leigða eða þeim búnaði sem um ræðir í fyrra horf. Telji leigutaki þörf á lagfæringum á innanstokksmunum hins leigða skal hann tilkynna leigusala um það í samræmi við skyldur sínar samkvæmt 15. gr. samnings þessa. Leigutaka er heimill aðgangur og afnot af sameign húsnæðisins að gættum þeim húsreglum sem í gildi eru og öðrum almennum reglum þar um. 

Leigusali á rétt á aðgangi að hinu leigða með hæfilegum fyrirvara og í samráði við leigutaka til að láta framkvæma úrbætur á hinu leigða og til eftirlits með ástandi þess og meðferð. Á síðustu sex mánuðum leigutímabils, hvort sem um er að ræða leigutímabil upphaflegs leigusamnings eða endurnýjaðs leigusamnings, sbr. 2. gr. samnings þessa, er leigusala heimilt að sýna væntanlegum kaupendum eða leigjendum hið leigða, en þó ekki meira en tvær stundir á dag. Tilkynna skal um slíka heimsókn með minnst sólarhrings fyrirvara og skal leigutaki eða umboðsmaður hans jafnframt vera viðstaddur. Leigusala er enn fremur heimilt að benda hugsanlegum leigutökum á að hafa samband við leigutaka í því skyni að skoða hið leigða. Er leigutaka skylt að sjá til þess að sú skoðun geti farið fram innan tveggja daga frá því að óskað var eftir henni. 

9. gr. Umgengni 
Leigutaka og fólki á hans vegum er skylt að sýna öðrum íbúum húsnæðisins tillitssemi í allri umgengni og notkun hins leigða og gæta þess að raska ekki eðlilegum afnotum, starfsró og svefnfriði annarra íbúa húsnæðisins eða valda þeim óþægindum eða ónæði. Leigutaka er skylt að hlíta þeim húsreglum sem í gildi eru fyrir húsnæðið á hverjum tíma, sem og öðrum reglum sem leigusali hefur sett eða kann að setja, enda eru slíkar reglur hluti af samningi aðila, sbr. 1. gr. Leigutaka er með öllu óheimilt að halda gæludýr, þ.m.t. hunda, ketti, fugla eða nagdýr, til styttri eða lengri tíma. Reykingar eru með öllu óheimilar í húsnæði Stúdentagarða, jafnt í íbúðum/herbergjum sem og sameign húsnæðisins. Öll meðferð fíkniefna er stranglega bönnuð. Hér er um að ræða umgengnisreglur skv. 3. mgr. 30. gr. húsaleigulaga nr. 36, 1994. Leigutaki hefur ásamt öðrum leigutökum rétt til afnota af sameign húsnæðisins og sameiginlegum búnaði þess, þ.m.t. þvottahúsi, eftir því sem mælt er fyrir um í húsreglum. Hyggist leigutaki og fjölskylda hans vera fjarverandi úr hinu leigða í lengri tíma en 10 daga skal hann tilkynna það til leigusala. 

Leigutaka er skylt að sjá til þess að heimilisfólk hans og gestir virði reglur um umgengni og fleira sem honum er skylt að halda. Leigutaki skal bæta það tjón á hinu leigða eða fylgifé þess, sem verður af völdum hans sjálfs, heimilismanna hans, gesta eða annarra manna sem hann hefur leyft afnot af hinu leigða eða umgengni um það. 

10. gr. Framleiga 
Leigutaka er með öllu óheimilt að framleigja leigurétt sinn eða hið leigða eða hluta þess án leyfis leigusala, hvort sem slíkt er gert gegn gjaldi eður ei. Slíkt bann er í samræmi við 1. mgr. 44. gr. húsaleigutala nr. 36, 1994. Bann þessa leigusamnings er þó víðtækara þar sem að undantekningarheimild 2. mgr. 44. gr. laganna gildir hér ekki. Í skilningi samningsins telst það því vera framsal leiguréttar að heimila nákomnum skyldmennum eða venslamönnum búsetu í hinu leigða húsnæði, og er slíkt bannað. Leigutaka er óheimilt að skipta um eða semja um skipti á hinu leigða við annan leigutaka innan Stúdentagarða nema að fengnu samþykki leigusala. Óski leigutaki eftir flutningi innan Stúdentagarða skal hann sækja um flutning samkvæmt úthlutunarreglum leigusala á vef hans, www.studentagardar.is. Komi til flutnings skal leigutaki greiða sérstakt milliflutningsgjald samkvæmt gjaldskrá leigusala. 

11. gr. Uppsögn 
Leigusamningar á Gamla Garði eru án uppsagnarákvæða. Samningar þar eru tímabundnir (29. ágúst – 26. maí, 29. ágúst – 31. desember eða 1. janúar – 26. maí). 

Uppfylli leigutaki ekki lengur skilyrði úthlutunarreglna Stúdentagarða eða vanefni að öðru leyti skyldur sínar samkvæmt samningi þessum, er leigusala heimilt að segja upp samningi þessum áður en leigutíminn er útrunninn. Er leigutaka þá skylt að rýma hið leigða að uppsagnarfresti loknum. Uppsögn skal gerð með skriflegri og rökstuddri tilkynningu sem send er leigutaka með a.m.k. þriggja mánaða fyrirvara. Með vanefndum í þessu tilliti er m.a. átt við þau atvik sem fram koma í 12. gr. samningsins. Slík uppsögn er í samræmi við 3. málsl. 2. mgr. 58. gr. húsaleigulaga nr. 36, 1994.

Um húsnæði Stúdentagarða utan Gamla Garðs gildir að leigutaka er heimilt að segja upp samningi þessum og skila hinu leigða áður en leigutíminn er útrunninn. Skal slík uppsögn fara fram á þar til gerðu eyðublaði á heimasvæði Stúdentagarða, www.studentagardar.is, með a.m.k. þriggja mánaða fyrirvara. Leigusali getur þó samþykkt skemmri fyrirvara ef sérstakar ástæður eru fyrir hendi, en þó aldrei skemmri en einn mánuð frá næstu mánaðamótum að telja. 

12. gr. Riftun 
Leigusala er heimilt í eftirfarandi tilvikum að rifta samningi þessum með skriflegri og rökstuddri tilkynningu áður en leigutíminn er útrunninn og er leigutaka þá skylt að rýma hið leigða að kröfu leigusala innan 30 daga frá því að slík tilkynning er send: 

1. Leigutaki greiðir ekki umsamið leigugjald, hússjóðsgjald eða önnur gjöld samkvæmt samningi þessum á réttum gjalddaga og sinnir ekki innan sjö sólarhringa skriflegri áskorun um greiðslu, enda hafi slík áskorun verið send eftir gjalddaga og leigusali þar tekið fram að hann muni beita riftunarheimild sinni. 

2. Leigutaki uppfyllir ekki lengur skilyrði úthlutunarreglna Stúdentagarða. 

3. Leigutaki brýtur ítrekað eða gróflega gegn þeim húsreglum sem gilda fyrir hið leigða og viðkomandi húsnæði á hverjum tíma. 

4. Leigutaki nýtir húsnæðið á annan hátt en lög eða leigusamningur þessi mælir fyrir um og lætur ekki af misnotkun þess þrátt fyrir skriflega áminningu leigusala. 

5. Leigutaki framselur leigurétt sinn í andstöðu við ákvæði laga eða leigusamnings þessa eða misnotar heimild sína til framleigu. 

6. Leigutaki meinar leigusala eða öðrum aðgang að hinu leigða án gildrar ástæðu. 

7. Leigutaki flyst úr hinu leigða áður en leigutíma er lokið án þess að hafa gert nauðsynlegar ráðstafanir til gæslu eða verndar þess. 

8. Hið leigða spillist í umsjá leigutaka vegna slæmrar umgengni eða hirðuleysis hans eða þeirra, sem hann ber ábyrgð á, og hann sinnir ekki án tafar kröfu um úrbætur. 

9. Leigutaki vanrækir, þrátt fyrir áminningu leigusala, skyldur sínar til að sjá um að góð regla og umgengni haldist í hinu leigða húsnæði eða gerist sekur um persónulega meingerð gagnvart leigusala eða öðrum leigutökum eða gestum í húsnæðinu. 

10. Leigutaki, gestir hans eða aðrir, sem hann ber ábyrgð á, gerast sekir um neyslu, vörslu, sölu, kaup eða hvers konar aðra meðferð fíkniefna í hinu leigða eða sameign húsnæðisins eða lóð þess. 

11. Leigutaki vanrækir að öðru leyti skyldur sínar samkvæmt lögum eða leigusamningi þessum á svo stórfelldan hátt að rýming hans úr húsnæðinu telst eðlileg eða nauðsynleg. 

13. gr. Breyttar forsendur 
Leigusamningur þessi fellur úr gildi ef hið leigða eyðileggst af völdum elds eða af öðrum ástæðum, hvort sem það gerist fyrir eða eftir að leigutaki hefur tekið við hinu leigða. Leigutaki á í slíkum tilvikum ekki rétt til neinna bóta úr hendi leigusala nema eyðileggingin sé sök leigusala sjálfs eða hann vanrækir að gera leigutaka viðvart um hana. 

Hætti leigutaki námi á leigutímanum eða í ljós kemur að hann hefur gefið rangar upplýsingar um hagi sína er máli skiptu við úthlutun á hinu leigða honum til handa, fellur samningur þessi úr gildi og er leigutaka þá skylt að rýma hið leigða að kröfu leigusala innan 30 daga frá því að honum var send skrifleg áskorun um rýmingu. Hið sama gildir einnig ef leigutaki eignast íbúðarhúsnæði á höfuðborgarsvæðinu meðan á leigutíma stendur. 

Maki eða sambúðaraðili leigutaka, sem ekki er jafnframt námsmaður í Háskóla Íslands, hefur ekki við sambúðarslit við leigutaka eða andlát hans rétt til yfirtöku á samningi þessum eða áframhaldandi leigu. Skal hann þá rýma hið leigða eins fljótt og aðstæður leyfa en þó aldrei síðar en þremur mánuðum frá sambúðarslitum eða andláti. Ákvæði 1. mgr. 45. gr. og 1. mgr. 46. gr. húsaleigulaga nr. 36, 1994 gilda ekki um leigusamning þennan.

14. gr. Lok leigutíma 
Leigusamningi þessum lýkur á umsömdum degi, sbr. 2. gr., án sérstakrar uppsagnar eða tilkynningar af hálfu aðila og skal leigutaki skila hinu leigða þann dag fyrir kl. 10:00. Hafi leigusamningurinn verið endurnýjaður í samræmi við ákvæði 2. gr. lýkur samningnum á þeim degi er nýju samningstímabili lýkur. Skili leigutaki ekki hinu leigða á tilsettum tíma er leigusala heimilt að heimta bætur sem jafngilda hálfri mánaðarleigu ef dráttur varir í eina viku eða skemur. Dragist skil lengur skuldbindur leigutaki sig til að greiða leigusala bætur sem jafngilda tvöfaldri leigu fyrir hvern dag sem skil dragast, auk alls kostnaðar sem leigusali kann að verða fyrir vegna þessa. 

15. gr. Ástand og skil hins leigða við lok leigutíma 
Að leigutíma loknum, sbr. ákvæði 2. og 14. gr., skal leigutaki skila hinu leigða í hendur leigusala ásamt tilheyrandi fylgifé í sama ástandi og hann tók við því. Ber leigutaki óskerta bótaábyrgð á allri rýrnun hins leigða eða spjöllum á því að svo miklu leyti sem slíkt telst ekki eðlileg afleiðing venjulegrar eða umsaminnar notkunar hins leigða eða stafar af atvikum sem voru leigutaka sannanlega óviðkomandi. Leigutaki ber óskerta bótaábyrgð ef umgengi hans um veggi eða loft hins leigða hefur verið með þeim hætti að nauðsynlegt er að endurmála veggi þess eða loft að hluta eða öllu leyti. 

Eftir skil á lyklum af hinu leigða húsnæði framkvæmir leigusali úttekt á húsnæðinu og hefur til hliðsjónar úttekt leigjanda við innflutning. Ef þrif reynast ekki fullnægjandi er leigusala heimilt að innheimta gjald hjá leigutaka án frekari fyrirvara.

Ef samningsaðilar eru ekki sammála um ástand hins leigða, þ.m.t. þrif, skemmdir á því eða tjón, er heimilt að kalla til annan fulltrúa leigusala til að skera úr ef aðilar eru ásáttir um það. Verði ágreiningur um tjón eða fjárhæð bóta er heimilt að kalla til úttektarmann samkvæmt XIV. kafla húsaleigulaga nr. 36, 1994 til að meta tjónið til fjár eða fá samþykki fyrir kostnaði hafi viðgerð þegar verið framkvæmd. Sá samningsaðili sem biður um slíka úttekt ber af henni allan kostnað. 

Afhendingarúttekt skal leggja til grundvallar ef til ágreinings kemur um skemmdir eða bótaskyldu leigutaka við skil hins leigða. Leigusali skal beina bótakröfu að leigutaka innan tveggja mánaða frá skilum hins leigða. Leigutaka er skylt að tilkynna leigusala um nýtt heimilisfang áður en hann flytur og skal tilkynningum samkvæmt þessari grein beint þangað. Að öðrum kosti framlengist upphaf tilkynningarfrestins samkvæmt framansögðu til þess tíma er leigusali fékk vitneskju um nýtt aðsetur leigutaka. 

16. gr. Ýmis ákvæði 
Leigutaka er skylt að taka þátt í hagsmunafélagi leigutaka Stúdentagarðanna sé það starfrækt í viðkomandi húsnæði. Kemur hagsmunafélagið fram gagnvart leigusala varðandi almenn hagsmunamál leigutaka húsnæðisins. Skal hagsmunafélagið meðal annars í samráði við leigusala sjá til þess að fylgt verði sérstökum húsreglum, sem leigusali setur. Er öllum íbúum húsnæðisins skylt að fylgja húsreglunum og teljast slíkar húsreglur hluti af samningi þessum, sbr. 1. gr. 

Umsjón Fasteigna er tengiliður milli leigutaka og leigusala og fylgist bæði með ástandi hins leigða sem og ástandi og búnaði húsnæðisins. Umsjón fasteigna tekur á móti beiðnum leigutaka um viðhald og endurbætur og sér jafnframt um framkvæmd þeirra. Þá er umsjón fasteigna jafnframt fulltrúi leigusala við afhendingu og skil á hinu leigða. Hann tekur einnig á móti kvörtunum vegna brota á húsreglum og leitast við að leysa slík mál. Félagsstofnun stúdenta ræður garðprófast og/eða ræstingarstjóra fyrir hvern stúdentagarð um sig. 

Greini aðila leigusamnings þessa á um gerð eða framkvæmd hans geta þeir leitað til Kærunefndar húsaleigumála samkvæmt 85. gr. húsaleigulaga nr. 36, 1994 og óskað eftir áliti nefndarinnar um ágreiningsefnið. Heimild til að leita álits kærunefndarinnar skerðir ekki rétt aðila til að leggja ágreining sinn fyrir dómstóla. Rísi mál vegna samnings þessa skal það rekið fyrir Héraðsdómi Reykjavíkur. 

Samningur þessi er gerður í tveimur samhljóða eintökum og heldur hvor aðili um sig sínu eintaki. 

Eigi að þinglýsa leigusamningi þessum, sbr. 12. gr. húsaleigulaga nr. 36, 1994, ber leigutaki allan kostnað af þinglýsingu. Komi til þinglýsingar er leigutaka án frekari samþykkis leigusala heimilt að aflýsa samningnum að leigutíma loknum. Hafi það ekki verið gert innan sjö daga frá lokum leigutíma er leigusala heimilt að aflýsa samningnum án frekari viðvarana. Skuldbindur leigutaki sig til að greiða leigusala sérstakt umsýslugjald vegna aflýsingarinnar samkvæmt gjaldskrá leigusala, nú kr. 5.000. 

Með undirritun sinni staðfestir leigutaki að hann hafi kynnt sér ákvæði samnings þessa, sem hann samþykkir í einu og öllu, húsaleigulög nr. 36, 1994, úthlutunarreglur Stúdentagarða og þær húsreglur sem um hið leigða gilda, sbr. 1. gr. samnings þessa.